深圳景點推薦｜5大必去景點＋附近時鐘酒店

北上深圳玩樂，除咗食火鍋、按摩同Shopping，其實仲有唔少地方值得專程去玩。想坐過山車可以去歡樂谷，鍾意影相就去世界之窗；如果想搵個地方睇海、散步、食晚飯，深圳灣、人才公園同蛇口海上世界都係唔錯嘅選擇。

不過深圳咁大，第一次安排約會行程，最怕就係景點分散，朝早去羅湖、下午趕去南山，時間全部花喺搭車度。今篇深圳景點推薦會幫大家整理5個各有特色嘅目的地，包括門票、營業時間同地鐵交通，等你可以先揀啱自己嘅玩法，再深入睇個別景點攻略。

另外，如果兩個人玩完想休息幾個鐘，亦整理咗5間Flow上可以預訂嘅深圳時鐘酒店。唔一定要訂一晚住宿，按行程安排Daycation，一樣可以令北上約會舒服好多。

5大深圳景點推薦

1. 世界之窗

如果想去一個可以慢慢行、影好多相，又唔使不停排機動遊戲嘅地方，世界之窗幾適合情侶。園區將埃菲爾鐵塔、凱旋門等世界著名建築縮小重現，仲有唔同國家主題區域、表演同娛樂設施。兩個人可以當佢係一個大型戶外影相場景，邊行邊搵自己鍾意嘅角度。

世界之窗唔只得日間景色，夜晚亦有燈光效果及不定期表演。如果想控制預算，可以留意夜場門票；不過日間入場時間比較充裕，適合想一次行多幾個區域嘅人。想知道邊啲建築最值得影、點安排路線，可以再睇世界之窗獨立攻略。

門票價格：全日票約220人民幣，夜場票約120人民幣

地址：深圳市南山區華僑城深南大道9037號 ( Google Map Link )

交通資訊：深圳地鐵「世界之窗站」J出口，步行2-3分鐘前往

營業時間：09:30–21:30；夜場一般18:00起入場

2. 深圳歡樂谷

如果兩個人都鍾意機動遊戲，深圳歡樂谷就比純粹行街更有共同回憶。園內有唔同刺激程度嘅過山車、遊樂設施同主題區域，唔使由頭到尾都玩最刺激嗰啲，可以揀幾個重點項目，再留時間睇表演或者食嘢。

歡樂谷亦會按節日推出期間限定活動，部分日子設夜場，對情侶嚟講可以由下午一路玩到夜晚。不過熱門項目排隊時間可能較長，出發前最好先睇當日設施開放安排，唔好買完飛先發現最想玩嘅項目暫停。

門票價格：全日票約228人民幣，夜場票約159人民幣

地址：深圳市南山區僑城西街18號（ Google Map Link ）

交通方式：深圳地鐵「世界之窗站」A出口，步行約3-5分鐘

營業時間：09:30–23:00，夜場17:00開始

3. 深圳灣公園

唔係每次北上都想玩到攰。深圳灣公園沿住海岸線延伸，有步道、草地同唔同觀景位置，最適合兩個人慢慢散步。天氣好嘅日子，下午較後時間去，坐喺海邊吹風、睇住天色慢慢變暗，比趕住去幾個商場更有約會感。

公園本身唔使入場費，而且地鐵可以直達。不過整條海岸線好長，唔建議第一次去就諗住行晒。可以由深圳灣公園站附近開始，揀一段自己鍾意嘅海濱路線，留返其他位置下次再去。

地址：深圳市南山區濱海大道深圳灣公園（ Google Map Link ）

交通方式： 地鐵9號線「深圳灣公園站」D2出口

營業時間：06:00–23:00

4. 深圳人才公園

深圳人才公園最吸引嘅唔係大型遊樂設施，而係湖景配上南山一帶嘅摩天大樓。公園位於後海，佔地約77萬平方米，中央有大片湖面，周邊設有星光橋、草坪、觀景位置同休憩空間。黃昏時沿湖邊散步，可以望住「春筍」等地標建築慢慢亮燈，影相效果同一般海濱公園幾唔同。

如果係情侶北上約會，可以下午先去附近深圳灣萬象城食飯或者飲咖啡，傍晚再入人才公園行一圈。公園亦設有書吧，可以坐低休息。周五、周六及部分公眾假期晚上通常會有免費燈光秀，10月參考場次為19:30、20:30及21:30；遇上落雨或特別安排可能取消，唔好當成每日固定演出。

地址：深圳市南山區粵海街道科苑南路3329號( Google Map Link )

交通資訊：地鐵13號線「人才公園站」B1出口；亦可由2號線「登良站」C出口步行前往

營業時間：06:00–23:00

5. 蛇口海上世界

蛇口海上世界同前面幾個景點又係另一種感覺。最有辨識度嘅係明華輪地標，周邊有唔同風格嘅餐廳、酒吧同休閒空間，晚上亮燈之後特別適合散步。如果今次北上唔想行程太趕，可以直接喺蛇口安排一個下午加晚餐，唔使四圍轉場。

想加少少文化活動，仲可以行去海上世界文化藝術中心。建築面向海景，內有展覽、餐飲及藝術空間；個別展覽可能需要另外買飛。兩個人可以先睇展、再去海邊行一陣，最後返海上世界食晚飯，成條路線會比純粹去商場有趣。

地址：深圳市南山區蛇口海上世界片區 ( Google Map Link )

交通資訊：地鐵「海上世界站」C/D出口，步行8-10分鐘

營業時間：公共街區全天開放；文化藝術中心場館一般10:00–22:00，展覽有獨立時間

5 間深圳酒店推介

去深圳玩一日，未必需要訂足一晚酒店。尤其情侶由香港即日來回，下午行完街、玩完機動遊戲，想沖個涼或者休息幾個鐘，可以按實際行程揀附近日租酒店。

1. 杭泰酒店（深圳世界之窗店）

如果今次主要去世界之窗或者歡樂谷，杭泰酒店係一個偏實用、唔需要花太多預算嘅選擇。酒店位於白石洲一帶，酒店嘅悅享景觀大床房，設有窗戶，部分可望城市或高爾夫球場景觀。玩完主題樂園之後，兩個人可以先返房坐低休息，再決定要唔要出去食宵夜。

酒店附近亦有白石洲一帶嘅食肆，唔一定要全日留喺景區入面食嘢。佢唔係走豪華度假路線，優勢係房間夠用、位置配合主題樂園行程，而且價格相對容易控制。

價格範圍： CNY ¥540 起 / 2小時

酒店地址： 深圳市南山區石洲中路55號國際市長交流中心102號 ( Amap Link )

交通方式：地鐵白石洲站出口步行5-6分鐘

預訂入口： 杭泰酒店

2. 深圳澳澄海岸酒店

如果你哋鍾意深圳灣公園嗰種慢節奏，澳澄海岸酒店會比一般商務酒店更配合行程。酒店主打閱讀同人文攝影，大堂設有書吧、藝術展示空間同閱讀角，感覺唔係純粹放張床俾客人瞓覺。玩完海邊返酒店，想安靜休息幾個鐘，呢種環境幾適合。

酒店有城景飄窗大床房，以及落地窗大床房等選擇。從酒店步行約5分鐘可到深圳灣公園海岸線，對想將散步同Daycation排埋一齊嘅情侶幾方便。

價格範圍： CNY ¥199 起 / 4小時

酒店地址： 深圳市南山區蛇口街道東角頭社區藍天路15–18號( Amap Link )

交通方式：灣厦地鐵站A口步行8-10分鐘

預訂入口： 深圳澳澄海岸酒店

💡更多 Flow 深圳南山時租酒店

3. 深圳新世界偉瑞酒店

深圳新世界偉瑞酒店位於福田梅林，房間空間係佢比較突出嘅賣點。部分豪華商務房面積約646平方呎，唔使兩個人連行李都迫埋喺床邊；如果想住得更舒服，仲有一房一廳套房，睡房同客廳分開，適合想留喺酒店Hea半日嘅情侶。

除咗一般大床房，酒店亦有影院房、健康湯浴房等特色房型，可以按自己鍾意嘅休息方式去揀。想睇戲就揀影院房，想放鬆身體就留意湯浴房，唔一定要安排額外景點先叫做有節目。酒店位於梅林住宅區一帶，附近有餐飲選擇，適合本身會經福田口岸過關，或者打算喺福田繼續食飯、行街嘅人。

價格範圍： CNY ¥405 起 / 4小時

酒店地址： 深圳市福田區梅林梅華路新世界家園4棟 ( Google Map Link )

交通方式：地鐵梅村站步行10分鐘

預訂入口： 深圳新世界偉瑞酒店

4. 瑪吉酒店

如果行程最後會返羅湖食宵夜或者準備過關，瑪吉酒店可以作為較平價嘅休息選擇。酒店位於東門南路，房內基本配備包括遮光窗簾、電視、毛巾同風筒。

呢間比較適合將重點放喺深圳玩樂、酒店只作短暫休息嘅情侶。佢唔係大型度假酒店，但如果夜晚本身就打算去東門、國貿食飯，或者由羅湖口岸返香港，就可以順路安排。

價格範圍： CNY ¥136 起 / 2小時

酒店地址： 深圳市羅湖區東門南路3007號金龍大廈22至25樓 ( Google Map Link )

交通方式：深圳地鐵國貿站B出口步行約10分鐘

預訂入口： 瑪吉酒店

💡更多 Flow 深圳羅湖時租酒店

5. 深圳蛇口海上世界品上酒店

如果今次目的地係蛇口海上世界，品上酒店最吸引嘅唔係房間有幾大，而係成間酒店嘅設計氣氛。酒店以紅磚、綠植同園林元素營造空間感，唔係一般千篇一律嘅商務酒店裝修。酒店提供城景大床房，房內有休閒梳化及雨淋頂噴。

對情侶嚟講，可以下午先去海上世界文化藝術中心睇展覽，黃昏去海邊散步，夜晚食完飯再返酒店休息。咁樣就唔使由南山趕去福田或者羅湖，成日行程都留喺蛇口。

價格範圍： CNY ¥330 起 / 4小時

酒店地址： 深圳市南山區蛇口太子路111號 ( Amap Link )

交通方式：地鐵海上世界站步行10分鐘

預訂入口： 深圳蛇口海上世界品上酒店

如果係第一次北上深圳，建議先揀一種玩法，而唔係將5個景點全部塞入一日。鍾意刺激就去深圳歡樂谷；想影相同睇主題表演，可以揀世界之窗；想慳錢、慢慢行，可以去深圳灣公園；想睇城市天際線同燈光秀，就留到黃昏去深圳人才公園。

情侶想安排夜晚約會，可以優先考慮蛇口海上世界，食飯同散步比較容易排埋一齊。至於深圳景點地鐵直達，世界之窗、歡樂谷、深圳灣公園、人才公園同海上世界都可以搭地鐵去到附近，唔一定要全程叫車。

同場加映：

深圳一日遊攻略 | 港人北上一日遊攻略：美食購物及高質日租酒店

深圳按摩推介｜12間必試酒店水療按摩+時租酒店精選！情侶放鬆按摩全攻略（福田/羅湖/深圳灣）

深圳好去處推介！情侶必去6間時租酒店 + 深圳灣/福田/羅湖打卡熱點全攻略深圳好去處

— 認識Flow —

若只需數小時的住宿或工作空間，為何要預訂一整天？

一個為都市空間而設的預訂平台，Flow為您在日間預訂數小時至半天的酒店或工作空間，作短暫停留。跟傳統整天預訂相比，Flow用戶可節省高達75%的費用。

立即下載Flow App，輕鬆找到附近可供使用嘅時段酒店或辦公室！

深圳景點 FAQ：常見問題解答